БИШКЕК, 28-июль — Sputnik. КМШ аскерлеринин алгачкы аскердик-спорт оюндарына 40тан ашуун аскер кызматкерлери катыша турганын Sputnik агенттигине КРдин Башкы штабы билдирди.
Тарыхта биринчи жолу өтө турган мелдеш Улуу Жеңиштин 70 жылдыгын белгилөөнүн алкагында Москванын ЦСКА клубунда башталды. Бул тууралуу Россиянын Коргоо министрлигинин маалыматында айтылат.
Иш-чарага Армения, Белоруссия, Казакстан, Тажикстан, Кыргызстан жана Россиянын Куралдуу күчтөрүнүн 300гө жакын спортчулары, Улуу Ата Мекендик согуштун ардагерлдери, Олимпиада оюндарынын катышуучулары, Европа чемпиондору жана башка коноктор катышууда.
Оюндар спорттун он түрү боюнча өтөт. Анын алтоо аскердик болуп саналат. Мындан тышкары аскер спортчулары даярдык үчүн маанилүү болгон дзюдо, сууда сүзүү сыяктуу түрлөр боюнча да ат салышат.
Биринчи ирет КМШ алкагында командирлик оюндар өтөт. Мында взводдун командиринен баштап бригаданын командирине чейинки аскер адамдары катышат.
Оюндар 1-августка чейин уланат.
