БИШКЕК, 31-июль — Sputnik. Кара-Суу районунда республикалык бюджеттин эсебинен 27 социалдык объект курулуп жатканын Каржы министрлигинин маалымат кызматы билдирди.
Ага ылайык, объекттердин курулушуна жыл башынан бери республикалык бюджеттен "Капиталдык салымдар" беренеси боюнча 59 миллион сом бөлүнгөн. Мындан улам Кара-Суу районунда бюджеттин эсебинен 27 социалдык объект, анын ичинде эки фельдшердик-акушердик пункт, үч бала бакча, он тогуз мектеп, үч спортзал курулуп жатканы белгилүү болду.
Андан тышкары аталган райондо түрк кредитинин эсебинен Савай, Кашкар-Кыштак, Учар, Стан, Сары-Колот, Беш-Мойнок жана Төлөйкан айылдарында жаңы мектептер курулду.
Капиталдык салымдар – кыргыз өкмөтүнүн токтому менен бекитилүүчү долбоорлордун сметалык каржылоосун өз ичине камтыган өнүктүрүү бюджетиндеги берене. Мамлекеттик артыкчылык орундагы социалдык-экономикалык мааниге ээ объектилерди өнүктүрүү үчүн пайдаланылат.
