БИШКЕК, 31-июль — Sputnik. Спорттук интернатты Жалал-Абаддын борборуна куруу пландаштырылып жатканын Мамлекеттик дене тарбия жана спорт агенттиги билдирди.
28-июль күнү агенттиктин директору Шейшенкул Бакиров Жалал-Абад облусунун коомчулугу менен жолугуп жатып, курулуш тууралуу айтты.
Курулуш иштери үчүн жер тилкеси бөлүнгөнү менен бюджетте ал үчүн каражат каралган эмес.
"Бул маселени чечүү үчүн Жалал-Абаддын шаардык кеңеши интернатты ашар ыкмасы менен курууну сунуштады. Бул интернат бизге аба менен суудай зарыл. Аймакта таланттуу спортчулар көп, биз аларга колдоо көрсөтүшүбүз керек", — деди Бакиров.
Маалыматка ылайык, алгач интернатты Ошто куруу каралган. Сүйлөшүүлөрдөн кийин анализ жасалып, интернатты ИИМ обүектисинин ордуна куруу чечими кабыл алынган.
