БИШКЕК, 22-июль — Sputnik. Премьер-министр Темир Сариев Ысык-Көлдө өтө турган популярдуу эстрада аткаруучуларынын эл аралык "Мейкин Азия" фестивалын көрүү үчүн билет сатып алганын Sputnik агенттигинин жеке маалымат булактары билдирди.
23-25-июль күндөрү Ысык-Көлдүн "Рух Ордо" маданий борборунда өтө турган маданий иш-чара быйыл экинчи ирет өтүп жатат. Учурда даярдык иштери аягына чыгып, кечки саат сегизде акыркы репетиция болот. Эртең саат 10.00дө катышуучулар сахнага чыгуу кезегин аныктоо үчүн чүчү кулак кармашат.
Иш-чара үч күнгө бөлүнгөн:
- 23-июль күнү саат 20.00 — фестивалдын расмий ачылышы;
- 24-июль күнү саат 20.00 — фестивалдын экинчи сынак күнү;
- 25-июль күнү саат 20.00 — жеңүүчүлөргө байге тапшыруу салтанаты, коноктор менен лауреаттардын гала-концерти.
Фестивалга 17ден 35 жашка чейинки аткаруучулар катыша алат. Талапка ылайык, ар бири өз эне тилинде жана дагы бир чет тилинде эки чыгарма аткарат.
Учурда билеттер "Рух-Ордо" маданий борборунун кассасында 300 сомдон 500 сомго чейин сатылууда.
