БИШКЕК, 22-июль — Sputnik. Популярдуу эстрада аткаруучуларынын эл аралык "Мейкин Азия" фестивалынын катышуучулары үчүн 23-июлда саат 10.00дө чүчүкулак өткөрүлө турганын Маданият министрлигинин өкүлү Ринат Мурзаев билдирди.
Анын айтымында, бүгүн кечинде бардык катышуучулар Чолпон-Атага келип, саат 20.00дө башкы даярдыктан өтүшөт.
Маалыматка ылайык, учурда өнөрпоздордун талантын баалай турган калыстар тобу аныкталып, анын курамын төмөнкү абройлуу искусство чеберлери түзүштү:
- Дүйсен Касеинов — "ТҮРКСОЙ" уюмунун башкы катчысы, калыстар тобунун төрагасы, Казакстан;
- Исмет Заатов — "Чыгыш базары" эл аралык конкурсунун президенти, Россия;
- Гаяне Оганесян — Армения Республикасынын эмгек сиңирген артисти, Армения;
- Роза Зергерли — ырчы, Азербайжан;
- Бахтияр Ибрагимов — Тажикстан Республикасынын эмгек сиңирген артисти, Тажикстан;
- Муратбек Бегалиев — Кыргыз Республикасынын эл артисти, Кыргызстан;
- Алтынбек Коразбаев — Казак Республикасынын эл артисти, Казакстан;
- Амангелди Аманов — маданият ишмери, Түркмөнстан.
Аталган фестиваль Кыргызстанда быйыл экинчи ирет өткөрүлүп, ага дүйнөнүн 20 мамлекетинен келген эстрада ырчылары катышат.
"Мейкин Азия" эстрадалык аткаруучулардын эл аралык фестивалы болуп эсептелет жана Евразиялык континентте популярдуу ырлардын конкурсу болууну көздөйт. Конкурс 23-25-июль күндөрү Ысык-Көлдүн "Рух Ордо" маданий борборунда өтөт.
