БИШКЕК, 20-июль— Sputnik. Көз карандысыз эки уюмдун биргелешкен тергөөсү "Ислам мамлекети" (ИМ) террористтик тобунун согушчандары өзүн өзү коргоо курамдарына кирчү күрддөргө жана карапайым тургундарга каршы химиялык курал колдонгону туурасындагы маалыматтарды ырастады деп билдирет дүйшөмбүдө CNN телеканалы.
Улуу Британиянын Conflict Armament Research жана Sahan Research изилдөө топтору химиялык курал колдонулду деп болжолдогон үч окуяны иликтөөгө өз адистерин жиберген. Эки окуя Сириянын түндүк-чыгышындагы Эль-Хасака провинциясында, ал эми үчүнчүсү Ирактын түндүгүндөгү "Мосул" дамбасынын жанында күрддөр жайгашкан жерде катталган. Акыркысында 120 миллиметрлик куралдан ок чыгарылып, жарылбай калган.
"ИМдин согушчандары күрддөргө жана жарандык объекттерге каршы химиялык куралды колдонгон учур биринчи жолу далилденип жатат", — деп билдирген Conflict Armament Research изилдөөчүлөр тобу.
Сирия менен Ирактын бир топ жерлерин басып алган "Ислам мамлекети" террористтик уюму акыркы кездеги дүйнөлүк олуттуу маселеге айланган. АКШнын Борбордук чалгындоо башкармалыгынын маалыматы боюнча, 30 миңден ашык согушчандар курамына кирген бул топ өзү басып алган жерлерде "халифат" орнотулду деп жарыялап, өз жерин кеңейтүүгө умтулуп келет. ИМдин топтору Ливияда, Йеменде жана Жакынкы Чыгыш менен Түндүк Африканын башка өлкөлөрүндө уюшулган.
