БИШКЕК, 16-июль — Sputnik. Алмазбек Атамбаев "2014-жылдын 25-июнунда Жидда шаарында кол коюлган кыргыз өкмөтү менен Ислам өнүктүрүү банкынын ортосундагы "Кыргызстанда айылдарды туруктуу өнүктүрүү" долбоорун каржылоо жөнүндө кредиттик макулдашууну ратификациялоо тууралуу" мыйзамга кол койду. Бул тууралуу президенттин маалымат кызматы билдирди.
Ислам өнүктүрүү банкы Кыргызстанга 9 млн. АКШ доллары өлчөмүндө кредиттик каражаттарды бөлүүнү жактырган. Бул каражаттар Чүй облусунун Жайыл, Кемин жана Панфилов райондорундагы жакырчылыкты кыскартууга жумшалат. Тандалып алынган айылдардын жакыр тургундарына өзгөчө көңүл бурулат, ошондой эле аялдардын социалдык-экономикалык абалын жакшыртуу да көңүл тышында калбайт.
Мыйзам Кыргыз Республикасынын Жогорку Кеңеши тарабынан 2015-жылдын 17-июнунда кабыл алынган.
Мыйзам расмий жарыяланган күндөн тартып он күн өткөндөн кийин күчүнө кирет.
