БИШКЕК, 2-июль — Sputnik. Ош шаарында "Ынтымак бакчасы" аттуу долбоор башталды. Долбоордун максаты — шаардыктардын башын бир жерге чогултуп, маданият аркылуу ынтымакты бекемдөө деп билдиришти Ош шаарынын мэриясынын маалымат кызматынан.
"Мээрим жаштар" ынтымак майрамынын биринчи иш-чарасы өтүп, ага шаардагы кичинекей балдар жана калаа тургундары катышты. Ырчылар жана чыгармачыл балдардын катышуусунда концерттик программа тартууланды. Кичинекейлер арасында ар түрдүү кызыктуу конкурстар ойнотулуп, атайын даярдалган белектер жана акысыз балмуздактар таратылды.
Аталган саамалык Ош шаарындагы бардык 12 аймактык кеңешти камтып, 22-июлга чейин уланат.
Долбоордун максаты — шаардын жашоочуларын жана балдарды чоң ата, чоң энелери менен биргеликте аянтчага чакырып, ар түрдүү багыттагы оюндар аркылуу баарынын башын бириктирүү. Анын алкагында балдарды ар тараптан өнүктүрүүгө багытталган спорттук таймаштар, викториналар жана чыгармачыл конкурстар уюштурулуп турмакчы.
