БИШКЕК, 29-июнь — Sputnik. КСДП фракциясы Суу кодексине өзгөртүү киргизүү боюнча мыйзам долбооруна добуш бербөөнү чечти. Бул туурасында фракция лидери Чыныбай Турсунбеков билдирди.
"Биз өкмөткө Лысый жана Давыдов мөңгүлөрү кабылган кырдаалга Кыргызстандын башка мөңгүлөрү эч убакта туш болбой тургандай чечим кабыл алуу зарыл экенин айттык. Мындан ары эч ким өзүнүн күнүмдүк кызыкчылыгы үчүн мөңгүлөрдү садага чаба албагыдай болушу керек. Ар кандай варианттарды табууга аракеттенип, акырында, КСДПнын пикири боюнча, азыркы мыйзам долбоору буга кепил боло албайт деген чечимге келдик", — деди Турсунбеков.
Фракция лидери бул маселе саясатташып кеткендиктен, кээ бир кесиптештери саясий упай топтоп жатат деген пикирин айтты.
"Өкмөт бул демилге менен парламентке кимдир бирөөлөрдүн жеке кызыкчылыгы үчүн кайрылып жатпаганы түшүнүктүү. Тескерисинче, биз өкмөттүн бул аракетинен жарандык чечкиндүүлүктү жана жоопкерчиликти көрүп турабыз. Ондогон жылдан ашуун мезгилден бери ЖКда олтуруп, Кыргызстандын жаратылыш байлыктарын жок кылынып жатканын көрүп туруп, билмексен болуп келишкен, ал эми бүгүн кыйкым таап жатышкан биздин айрым кесиптештерибизге караганда анын позициясы ачык жана так. Ал эми кимдир бирөөлөр үчүн мөңгүлөрдү сактоо кандай да болсо саясий упай топтоонун амалы экени көрүнүп турат", — деди Турсунбеков.
Өткөн аптанын бешинчи күнү ЖК "Кумтөр" кениндеги мөӊгүлөрдү башка жерге көчүрүп, кенди ачык ыкма менен иштетүүгө уруксат бере турган Суу кодексине толуктоолорду киргизүү боюнча мыйзамдын долбоору экинчи окууда добуш берүүгө жөнөткөн.
