БИШКЕК, 12-июнь — Sputnik. Жумгал менен Кара-Балтада шамал болду, өлкөнүн түштүгүндө абал тынч экенин ӨКМдын кризистик абалды башкаруу борборунун жетекчиси Мухаммед Сваров Sputnik сайтынын кабарчысына билдирди.
Буга чейин ӨКМ борбор калаада катуу шамал боло турганын билдирип, шамалдын ылдамдыгы секундуна 20 метрге чейин жетет деп эскерткен.
Сваровдун айтымында Кара-Балтада ылдамдыгы секундуна 18 метрге жеткен шамал болду. Жабыр тарткандар жок.
"Жогорку зонада жана Байтик айылында шамалдын ылдамдыгы секундасына 15 метрге жетти. Чаекте (Жумгал району) шамалдын ылдамдыгы секундуна 22-24 метрге жетти. Өлкөнүн түштүгүндө абал тынч. Чатырлардын учушу, жыгылган бактар катталган жок", — деди Сварив
Жума башында, дүйшөмбү күнү Бишкек шаарында жана Чүй облусунда кечки саат сегиздер чамасында катуу шамал болуп, үйлөрдүн чатырларын учуруп, бактар сынып автомашиналарды басып калган болчу. ӨКМдин маалыматы боюнча шамалдын ылдамдыгы секундуна 25-27 метрге жеткен. Шамалдын кесепетинен сегиз машина жабыркап, 80ен ашык бак сынган.
