БИШКЕК, 11-июнь — Sputnik. "Түндүкэлектро" ААК дүйшөмбү күнү болгон катуу шамалдан үзүлгөн электр зымдарын кайра калыбына келтирүү иштерин улантып жатат деп билдирди компаниянын маалымат кызматынын жетекчиси Гуля Мураталиева.
Катуу соккон шамалдын жана нөшөрлөгөн жаандын кесепетинен дүйшөмбүдө Бишкектин Чыгыш РЭСине караштуу 10/6-0,4 киловольттук 90 электр зымы үзүлүп, 55 трансформатордук подстанциянын жабдуулары жабыркаган жана 10/6-0,4 киловольттук электр жарыгын берүү линияларынын тирегичтери кулаган.
Чыгыш РЭСинин диспетчердик кызматына 8-июндан 10-июнга чейин 205 арыз келип түшкөн.
"Бүгүнкү күндө борбор калаанын чыгыш бөлүгүндө үзүлгөн 77 электр зымы кайра калыбына келтирилип, 45 трансформатордук подстанция оңдолду, ошондой эле электр жарыгын берүү линияларынын кулап калган сегиз тирегичи алмаштырылды. Азыр дагы абоненттердин 38 арызы боюнча иш жүрүп жатат", — деди Мураталиева.
Борбордун Батыш РЭСинде бороон-чапкын учурунда 102 электр зымы үзүлүп, 27 трансформатордун подстанциянын жабдуулары жабыркаган жана төрт электр жарыгын берүү линиясынын тирегичи кулап калган.
"0,4 киловольттук линиялар боюнча Батыш РЭСинин диспетчердик кызматына 385 арыз келип түштү. Азыр абоненттердин 35 арызы боюнча иштеп жатабыз", — деп билдирди маалымат кызматынын жетекчиси.
Учурда электр оңдоочулардын 30 токтоосуз чара көрүү тобу авариялык бузулуулардын үстүндө иштеп жатат деп сөзүн аяктады Мураталиева.
