БИШКЕК, 25-мар. — Sputnik. Алмазбек Атамбаев Австрияга жасаган расмий сапарынын алкагында Европадагы коопсуздук жана кызматташуу боюнча уюмдун (ЕККУ) башкы катчысы Ламберто Заньер менен жолукканын президенттин маалымат кызматы билдирди.
Заньер Кыргызстандын өлкөдө коомдук-саясый туруктуулукту сактоодогу, парламенттик демократия куруудагы, демократиялык институттарды өнүктүрүүдөгү жетишкендиктерин белгиледи.
Президент Алмазбек Атамбаев Кыргызстандын ЕККУ менен кызматташуусунун маанисин баса белгилеп, өлкөдө таза жана ачык-айкын шайлоолорду уюштуруу жана өткөрүү боюнча аракеттер көрүлүп жатканын билдирди.
"Быйыл күзүндө Кыргызстанда маанилүү окуя – парламенттик шайлоо өткөрүлөт. Биз бул өнөктүктү жаңы эрежелердин негизинде акыркы жетишкендиктерди колдонуу менен өткөрөлү дегенбиз. Себеби, эки жарым жылдан кийин Кыргызстандын жаңы президентине шайлоо болот. Ал жерде ачык-айкындык жана таза өткөрүү өзгөчө мааниге ээ", — деди Атамбаев.
Өлкө президенти ошондой эле, ЕККУнун жардамы менен парламенттик шайлоону татыктуу өткөрүп, 2017-жылдагы президенттик шайлоого даяр болобуз деген оюн кошумчалады.
ЕККУнун башкы катчысы быйыл Кыргызстанда парламенттик шайлоону өткөрүүгө колдоо көрсөтүүгө даяр экендигин билдирди.
