БИШКЕК, 16-мар. — Sputnik. Бишкек шаарынын борбордук бөлүгүндө орун алган Кааба уулу Кожомкул атындагы спорт сарайына бомба коюлгандыгы жөнүндө жалган маалымат берген киши кармала электигин ИИМдин маалымат кызматы Sputnik сайтынын кабарчысына билдирди.
Ишемби күнү, 14-мартта эрежесиз эр уруш мелдеши башталар алдында белгисиз бирөөлөр 102 номерине чалып, Спорт ордосуна бомба коюлгандыгы жөнүндө билдирүү беришкен. Мелдешти көрүүгө келген эл сыртка чыгарылып, милиция кызматкерлери менен Улуттук мамлекеттик коопсуздук боюнча комитетинин (УКМК) саперлеру келишкен. Бомба жөнүндөгү билдирүү жалган экени аныкталып, мелдешти өткөрүү кийинки күнгө жылдырылган.
ИИМдин маалымат кызматы билдиргендей, учурда жалган маалымат берген кишини кармоо аракеттери көрүлүп, маалымат топтолууда.
Эгер аталган факты боюнча материалдар УКМК келип түшсө, кылмыш иши козголо турганын мекеменин маалымат катчысы Рахат Сулайманов кабарлады.
