БИШКЕК, 28-янв — Sputnik. Айылдашын атып салган Жумгал районунун Таш-Дөбө айылынын айыл башчысынын ишин учурда райондук прокуратура өз өндүрүшүнө алып, иш тергелип жатат. Бул тууралуу Sputnik сайтына Нарын облустук прокуратурасы билдирди.
Оор жарадар болгон жаран Жумгал райондук ооруканасынын жандандыруу бөлүмүнө жеткирилген. Бирок, эртеси, 23-январда ал каза болгон.
Алдын ала маалыматтар боюнча каза болгон адам айыл өкмөтүнүн үйүнө барып, анын тынчын алган.
Райондук милиция изи сууй электе 47 жаштагы айыл башчысын кармап, убактылуу кармоо жайына камакка алган болчу.
Учурда иш райондук прокуратура тарабынан тергелип жатат, тергөөнүн жыйынтыгы боюнча аталган окуяга тийиштүү юридикалык баа берилет.
Айыпталып жаткан киши кызмат адамы болгондуктан, иш райондук прокуратурада каралып жатканын облустук прокуратурадан белгилешти.
Мыйзам боюнча тергөө иши 2 ай жүрөт.
