БИШКЕК, 27-янв — Sputnik. Жумгал районунун Таш-Дөбө айылынын башчысы Н.Б. жергиликтүү тургун М.С.ти 22-январь күнү түнкү саат 23:45тер чамасында мылтык менен аткан. Оор жарадар болгон жаран Жумгал райондук ооруканасынын жандандыруу бөлүмүнө жеткирилген. Бирок, 23-январда ал каза болгон.
Райондук милиция изи сууй электе 47 жаштагы Н.Б.ди кармап, убактылуу кармоо жайына камакка алышкан.
Алдын ала маалыматтар боюнча айыл башчы менен М.С.тин ортосунда пикир келишпестик болуп, айыл башчысы аны мылтыгы менен атып салган. Окуянын чоо-жайын учурда милиция кызматкерлери териштирүүдө.
Жергиликтүү тургундардын биздин сайтка билдиришинче, М.С. аттуу жаран айылда бир топтон бери жашабайт жана тынчы жок киши болгон. Ал мектепте окуп жүргөндө эле кесилип кеткенин кошумчалашты.
Маркумдун атасы Абыл Салидинов Sputnik сайтына билдиргендей, учурда окуяны укук коргоо органдары териштирип жатат.
"Балам менен айыл өкмөт башчынын ортосунда эмне чыр болгонун билбейм. Аны милиция териштирген соң гана бир жыйынтык чыгат го. Балам айылга чоң апасына учурашканы барган. Ал алардын колунда чоңойгон болчу. Балам шаарда турчу, аялы менен ажырашып кеткен. Бир баласы бар ", — деди ал.
Нарын облустук ички иштер башкармалыгынын маалыматы боюнча айыл өкмөт башчынын мылтыгы каттоого алынган эмес.
Н.С.тин өлүмүнө себепкер болгон айыл өкмөт башчысы учурда камакка алынып, кылмыш иши козголду. Милиция кызматкерлери иликтөө иштерин жүргүзүүдө.
