БИШКЕК, 24-ноя — Sputnik. КР менен РФ ортосунда кыргыз-россиялык өнүктүрүү фондун түзүү жөнүндө макулдашууга кол коюлду. Бул тууралуу президенттин аппаратынын маалыматтык саясат бөлүмү билдирди.
Президент Алмазбек Атамбаев Кыргызстандын экономикасын өнүктүрүүдөгү жана Евразия мейкиндигинде интеграциялык процесстерге катышуу шарттарына ыкташууда кыргыз-россиялык өнүктүрүү фондунун маанисин баса белгиледи.
Мамлекет башчысы Фонддун каражаттары Кыргызстанга дагы, Россияга дагы пайда келтирген түрдүү тармактардагы конкреттүү долбоорлорду ишке ашырууга пайдаланылууга тийиш экендигин билдирди.
"Биринчи кезекте атамекендик ишкерлерди колдоого алууга жана Кыргызстан Евразия экономикалык биримдигине кирип жаткан шарттарда алардын атаандашууга жөндөмдүүлүгүн арттырууга багытталган Өнүктүрүү фондунун ишин натыйжалуу уюштуруу зарыл", — деди Атамбаев.
Фонддун уставдык капиталы 500 миллион доллар. Алгачкы жүз миллиону 2014-жылдын аягына чейин келип түшөт. Калган каражат 2016-жылдын майына чейин которулушу керек. Андан тышкары, россиялык тарап Эл аралык өнүктүрүү ассоциациясынын шарттарында Кыргызстандын өкмөтүнүн кепилдиги жок эле 500 миллион доллар суммасына абдан жеңилдетилген карызды Фонддун ишине тартуу боюнча милдетти өз мойнуна алууда.
Кыргыз-россиялык өнүктүрүү фонду 2014-жылдын 29-майында Астана шаарында кол коюлган евразиялык экономикалык интеграциянын шарттарында экономикалык кызматташууну өнүктүрүү жөнүндө Кыргыз-Орус өкмөтүнүн ортосундагы макулдашууну ишке ашыруу максатында түзүлүүдө.
