БИШКЕК, 29-окт. — Sputnik. АКШ "Ислам мамлекети" террордук уюмунун башчысы Аль-Багдадинин сөөгүнөн "арылганын" штабдардын бириккен комитетинин жетекчиси Марк Милли аттуу адам билдирген. Бул туурасында РИА Новости жазды.
"Анын сөөгү тиешелүү эрежелер менен жок кылынды", — деген ал.
Буга чейин Fox News телеканалы Аль-Багдадинин деңизге көмүлгөндүгүн кабарлаган. Reuters агенттиги маалымат булактарына шилтеме берип, мындай жол менен маркумду акыркы жайга узатуу ислам дининин талаптарына жооп берет деп жазган. Анын кайда, кандайча жол менен жерге жашырылгандыгы маалымдалган эмес.
Генерал "Ислам мамлекети" террордук уюмунун башчысын жок кылгандагы тууралуу далилдерди айтып берген. Алардын жашыруун жактары ачылып, маалым болгондон кийин сүрөтү, видеосу көрсөтүлмөкчү.
Ал атайын даярдыктагы аскерлер Идлибде эки адамды кармагандыгын, учурда алар корголгон жайда АКШнын карамагында экенин кошумчалаган. Милли бир катар материалдар алынганын, бирок аны азырынча ачыктабай турарын да айткан.
Генералдын билдиришинче, Вашингтон атайын операция учурунда башка мамлекеттердин аскер күчтөрү менен кабарлашып, иш-аракеттерин координациялап турган.
Кремлден "Ислам мамлекетинин" башчысынын өлтүрүлгөнү тастыкталса, анда бул Дональд Трамптын эл аралык терроризм менен күрөшүүгө кошкон чоң салымы болорун айтышкан.
Аль-Багдади (Ибрагим Авад Ибрагим аль-Бадри — ред.) коомчулукка 2014-жылдын июль айында Мосул шаарын басып алып, Жакынкы Чыгышта "ислам халифатын" орнотом деп жар салгандан кийин чыга баштаган. Андан бери Аль-Багдадинин жок кылынгандыгы тууралуу басылма беттеринде бир нече ирет маалымат чыгып, бирок тастыкталган эмес.
2011-жылы АКШнын мамлекеттик департаменти Аль-Багдадинин жүргөн жерин так билдиргендерге 10 миң доллар убада кылган.
