БИШКЕК, 23-окт. — Sputnik. Тайсон каймана аты менен таанымал кыргызстандык мушкер Канат Келдибеков ACA (Absolute Championship Akhmat — ред.) спорттук уюму менен жаңы келишимге кол койду. Бул туурасында ал Instagram баракчасы аркылуу кабарлады.
"Ассалому алейкум, кыргыз элим. ММА уюмдарынын ичинен дүйнө жүзү боюнча экинчи орунда турган промоушен менен жаңы контракт түздүк. Absolute championship Akhmat уюмунун негиздөөчүлөрүнө жана менеджериме (Марат Бекмуратов) ыраазычылык билдирем. Буйруса, элиме жеңиш тартуулаганга бүт күчүмдү жумшайм", — деп жазды спортчу.
Келдибековдун менеджери Марат Бекмуратов Sputnik Кыргызстан маалымат агенттигине билдиргендей, келишим төрт беттешке түзүлгөн. Мушкердин кийинки мелдеши ноябрь айында Казакстанда өтүшү ыктымал.
Эске сала кетсек, Келдибеков аталган уюмдун алкагында келишим боюнча соңку беттешин ушул жылдын 4-октябрында Грозный шаарында өткөрүп, жергиликтүү спортчу Дукваха Астамировду калыстардын чечими менен утуп алган.
Тайсон ММА боюнча жалпысынан 13 беттешти утуп, төрт ирет жеңилген. Ал ACA уюму менен 2018-жылы үч беттешке кол коюп, бир жолу утулуп калган.
Аталган уюм дүйнө жүзүндөгү промоушендердин ичинде экинчи орунда турары Мma-oracle сайтында жазылган. Биринчи орунда UFC турат.
