БИШКЕК, 13-фев. — Sputnik. Жогорку Кеңештин мурдагы депутаты Данияр Тербишалиев жиу-житсу боюнча турнирде "түндүк-түштүк" ыкмасын колдонуп жеңишке жетишти. Бул тууралуу Sputnik Кыргызстан агенттигинин кабарчысына Тербишалиев өзү билдирди.
RAK International Professional Jiu Jitsu Championship сынагы Бириккен Араб Эмираттарында өтүп, ага ар кандай салмактагы жана курактагы спортчулар катышты.
Тербишалиевдин айтымында, анын каршылаштарынын бири бразилиялык белгилүү мушкер, мурдагы UFC чемпиону жана MMA, UFC жана жиу-житсу боюнча машыктыруучу Антонио Ногейранын шакирти болгон.
"Бул спорт менен бир жарым жылдан бери машыгып келем. Эми өмүр бою улантууну пландап жатам. Өсүп келе жаткан муун дагы көп окуп спорт менен машыгуусу керек деп эсептейм", — деди спортчу.
Ал ошондой эле үстүбүздөгү жылдын апрель айында өтө турган жиу-житсу боюнча дүйнөлүк чемпионатка даярдык көрүп жатканын билдирди.
Жиу-житсу — бул күрөштүн бир түрү. Анда муунтуу жана кайруу ыкмалары колдонулат. Бул байыркы япон күрөштөрүнүн бир түрү болуп эсептелет.
