БИШКЕК, 21-авг. — Sputnik. Медицина багыты боюнча билим алчулар үчүн кошумча 90 гранттык орун бөлүнгөнүн Билим берүү жана илим министрлигинин маалымат кызматы кабарлады.
Билдирмеге ылайык, кечээ, 20-августта, өкмөт медицина кадрларын даярдоодо гранттык кабыл алуу планын көбөйтүү боюнча токтом кабыл алган. Бул пандемия шартындагы ак халатчандарга болгон муктаждыкты эске алуу менен чечилген.
18 миңден ашык абитуриент өттү. ЖОЖго кабыл алуунун төртүнчү туру аяктады
Министрлик 90 гранттык орундун 70ин дарылоо иши адистигине жана 20 орунду медициналык-профилактикалык иш адистигине деп бөлгөн. Бул эки тармакта бакалаврды аяктаган студенттер эпидемиолог, инфекционист, пульмонолог, вирусолог жана реаниматолог багыты боюна ординатурада окуусун улантышы керек.
Гранттык орундар бөлүнгөн ЖОЖдор:
- Кыргыз мамлекеттик медициналык академиясы. Дарылоо ишине — 30, медициналык-профилактикалык иш адистигине — 10;
- Кыргыз-Россия славян университети. Дарылоо иши адистиги — 20;
- Ош мамлекеттик университети. Дарылоо ишине — 20, медициналык-профилактикалык иш адистиги — 10.
Бюджеттик орундарга абитуриенттерди кабыл алуу жана талондорду каттоо 22-24-август күндөрү саат 14:00гө чейин жүргүзүлөт. Ал эми 25-26-август саат 17:00гө чейин абитуриенттер ЖОЖдо окуу каалоосун тастыкташы шарт.
Сынакка катышуу үчүн абитуриенттер сайтына кирип катталышы керек.
