БИШКЕК, 3-авг. — Sputnik. Премьер-министр Кубатбек Боронов Россиядан келген медицина кызматкерлери менен сүйлөшүп, эпидемияга каршы күрөшүү чараларын жана өлкөдөгү кырдаалды жакшыртуу үчүн четөлкөлүк дарыгерлердин сунуштарын укту. Бул тууралуу өкмөттүн маалымат кызматы кабарлады.
Ага ылайык, сүйлөшүү учурунда Россиядагы керектөөчүлөрдүн укугун коргоо жана адамдык бакубатчылык боюнча федералдык кызматына (Роспотребнадзор) караштуу Вирусология институтунун директорунун орун басары Наталья Пшеничная коронавирус менен күрөшүүдө жергиликтүү медиктер жанын аябай иштеп жатканын белгиледи.
"Ар бир бейтапка өзүнчө, квалифицикациялуу мамиле жасалганы мени таасирлентти",— деди Пшеничная.
Россиялык адистер Гансидеги "Семетей" обсервациясын лабораториялык жана дартты аныктоо кызматтары менен камсыз кылууну сунуштап, лабораториядагы кадрдык курамды күчтөнтүш керектигин белгилешкен. Ошондой эле кошумча топ түзүп, аймактарда компьютердик томография жабдууларынын санын көбөйтүү зарылчылыгын айтышты. Медицина кызматкерлерине жеке коргонуучу каражаттарды коопсуз пайдалануу боюнча семинарларды өткөрүү тууралуу да сөз болду.
Заматта баары тозокко айланып кетерин эч ким күткөн эмес. Дарыгердин маеги
Өз кезегинде өкмөт башчы четөлкөлүк медиктердин тажрыйба иретинде берген жардамы үчүн ыраазычылык билдирип, тиешелүү мамлекеттик органдарга бир катар тапшырмаларды берген.
"Кыска мөөнөттүн аралыгында "Семетей" обсервациялык жайын лабораториялык кызмат жана башка керектүү жабдуулар менен камсыз кылуу боюнча иштерди жүргүзгүлө. Мындан тышкары, облустарга компьютердик томография алып берүү боюнча ар кыл варианттарды, ошондой эле мамлекеттик-жеке өнөктөштүктүн алкагында сунуштарды ыкчам түрдө карап чыккыла. Аймактарда ооруп жаткан жарандарды тезирээк аныктап, алардын абалы оорлошуп, өтүшүп кеткенине жеткирбей, үймө-үй кыдыруу боюнча иштерди күчөтүү зарыл", — деди Боронов.
Белгилей кетсек, буга чейин Россия Кыргызстанга коронавирус менен күрөшүүгө көмөк көрсөтүү максатында 50дөн ашык медик жөнөткөн.
