БИШКЕК, 16-июл. — Sputnik. Пневмония менен ооруп калгандар эми коронавирус болгон деп эсептелет. Бул туурасында вице-премьер Аида Исмаилова брифинг учурунда айтты.
Ал Саламаттык сактоо министрлиги коронавирус боюнча клиникалык нускаманын үчүнчү версиясын бекиткендигин айтты. Муну эксперттер иштеп чыккан. Ал коронавирус менен ооругандарды, илдеттин өтүшүп кеткен түрүн жана пневмонияны стационарда жана амбулатордук түрдө дарылоо алгоритминен турат.
Жарымы Бишкекте. Бир күндө пневмониядан 41 бейтап каза болду
Исмаилованын айтымында, оорунун эл аралык классификациясынын негизинде коронавирустун лабораториялык изилдөө менен аныкталган учуру U07.1 кодуна киргизилген. Ал эми лабораториялык изилдөөнүн жардамы менен аныкталбай, бирок клиникалык жана рентген аркылуу табылган учуру U07.2 кодуна бекитилген.
"Дарылоодо бирдиктүү система болуш үчүн Саламаттык сактоо министрлиги буйрук чыгарды. Анда ооруканадан сырткаркы пневмониянын U07.2 кодуна киргизилери айтылган. Ошентип, пневмония мындан ары коронавирустун болушу деп эсептелмекчи", — деди Исмаилова.
Ал эми коронавирус жана пневмония боюнча статистика бириктирилерин тактаган жок.
Коронавирустан бир күндө 75 адам сакайып чыкты
Март айынан бери пневмония жалпы 612 кыргызстандыктын өмүрүн алды. Ал эми коронавирус жуктуруп алып каза тапкандардын саны 167 кишини түздү.
Өлкө аймагындагы соңку кабарлар менен биздин Telegram-каналдан таанышып туруңуз.
