БИШКЕК, 14-июл. — Sputnik. Жогорку Кеңештин үч депутаты ЖКнын төргасы Дастан Жумабековго парламенттин кезексиз жыйынын өткөрүү сунушу менен кайрылышты. Бул тууралуу алардын маалымат кызматы кабарлады.
Кайрылуунун демилгечилери: Наталья Никитенко, Рыскелди Момбеков жана Жанар Акаев. Буга чейин алар 4-октябрга белгиленген парламенттик шайлоону жылдырууну сунушташкан.
Маалымат кызматы билдиргендей, регламентке ылайык, Жогорку Кеңештин сессияларынын ортосундагы аралыкта төрага кезексиз сессияны президент, өкмөт же Жогорку Кеңештин үчтөн биринен кем эмес эл өкүлдөрүнүн сунушу менен гана өткөрө алат.
"Тагыраагы, жогорудагы аты аталган депутаттардын сунушуна Жогорку Кеңештин депутаттарынын үчтөн бири кошулушу зарыл", — деп айтылат маалыматта.
Акаев Sputnik Кыргызстан агенттигине жыйында эки маселе каралышы керек экендигин айтты.
Депутат Сурабалдиеванын бир айлык маянасына дарыгер эмнелерди сатып алды. Сүрөт
"Өкмөт буга чейин парламентке берген отчетунда "биз баарына даярбыз, каражат жетиштүү" деп жаткан. Бирок натыйжада андай болгон жок. Өкмөттү чакырып ушуга жооп беришин талап кылышыбыз керек. Экинчиси — парламенттик шайлоонун мөөнөтүн жылдыруу. Азыркыдай кетсе дагы 15 күндөн кийин августта партиялар съездин өткөрүшү керек болот. Учурда кырдаал мындай болуп жатса (коронавирус боюнча абал – ред.), биз шайлоо менен жүрсөк туура эмес болот. Эгер ага чейин абал жакшырса, ушул бойдон калтырса болот", — деген Акаев.
Депутат эгер төрага буга макул болбосо өзүлөрү парламентарийлердин үчтөн биринен (41 депутат) кол топтоп чыгарын кошумчалады.
Белгилей кетсек, айрым кыргызстандыктар эпидемиологиялык кыйын кырдаалга карабай шайлоо өткөрөбүз деген бийликке нааразы болушкан.
30-июнда Жогорку Кеңеш кезектеги жыйынын өткөрүп, каникулга тарашкан.
