БИШКЕК, 3-июл. — Sputnik. Кыргызстандык дарыгер Жогорку Кеңештин депутатынын бир айлык маянасына өзүнүн ооруканасына коргонуучу жана керектүү каражаттарды сатып ала алды.
Bek Surap ысымы менен Facebook социалдык тармагынын колдонуучусу мамлекеттик ооруканалардын биринде иштейт. Ал бир нече күн мурун ЖКнын депутаты Элвира Сурабалдиевага кайрылып, айлык акысы менен бөлүшүүгө чакырган. Ага чейин эл өкүлү салыктан бошотулган жеке медициналык мекемелер коронавирусту жуктуруп алган бейтаптарды кабыл ала башташы керек экендигин айтып чыккан. Ошондо медицина кызматкери өкмөт өзүнүн милдеттерин ишкерлерге жүктөбөшү керектигин баса белгилеген.
Депутат ак халатчандын чакырыгына көңүл буруп, комментарийге анын банктык эсебин жана фамилиясын калтырып коюуну өтүнгөн.
Медиктердин абалын айткан жетекчи Акматова түз эфирде ыйлап жиберди. Видео
Ал дарыгер бүгүн депутат Сурабалдиева которгон акчага пневмония менен ооруп жаткан бейтаптарды дарылаган кесиптештерине өтө зарыл болуп турган кандай каражаттарды алып, тыйынды эмнеге коротконун тизмектеген.
Бир эл өкүлүнүн айлык маянасына төмөндөгүлөр алынган:
- Fp2 классындагы 200 фильтри менен көп жолу колдонууга мүмкүн болгон клапаны бар респираторлор. Бул аппараттар ыңгайлуу жана адамдын жүрөгүн айлантпайт;
- интубациялык (эндотрахеаль) түтүктөр;
- борбордук венага катетерлери
- желим өтүктөр.
"Мунун баары бюрократиясы жок, бат эле бир депутаттын айлыгына алынды. Балким 120 эл өкүлүнүн айлыгына, алардын кошумча төлөнгөн акчаларына кыйын кезеңде бир топ нерсе алса болот. Алар: дарыгерлердин жеке коргонуучу каражаттарынан баштап, бейтаптардын дары-дармектери жана медициналык буюмдар. Тилекке каршы, бул бир депутаттын эле айлыгы", — деп жазган дарыгер.
Анын жазганын алты саат ичинде эле 600дөн ашык интернет колдонуучу бөлүшүп, бир эл өкүлүнүн айлык маянасына ушунча көп нерсе сатып алууга мүмкүн экендигин айтышкан. Көпчүлүгү башка депутаттарды да ал демилгени колдоого чакырган.
