БИШКЕК, 4-июл. — Sputnik. Кыргызстандагы абал бир топ оор, жаштар абдан көп ооруп жатыптыр деп айтты Бишкекке келген Россиянын А.Н. Бакулев атындагы Кардиохирургия клиникасынын башчысынын милдетин аткаруучу Елена Голухова.
Роспотребнадзор менен Россиянын Саламаттыкты сактоо министрлигинен турган адистер Бишкекке 2-июлда учуп келген. Делегациянын курамына кесипкөй 10 адис кирген.
Алар ишке киришип жана Кыргызстандын Саламаттыкты сактоо министрлигине тест-системаларды беришти. Бригада коронавирус жана пневмонияга чалдыккандар жаткан үч ооруканада болгон.
Россиядан келген дарыгерлер ишке киришип, тест-система беришти. Сүрөт
Голухова алар Кыргызстандагы учурдагы абалга баа берүү үчүн келгендиктерин айтты.
"Россияга караганда Кыргызстанда абал бир топ оор экен, көп адам ооруга чалдыгыптыр, арасында жаштар көп экен. Биз коронавирус жана пневмонияга кабылгандар жаткан үч клиникага бардык", — деди врач.
Россиялык дарыгерлер кыргызстандык кесиптештерине "таза" жана "кир" деп бөлүнгөн аймактардын талабын сактоо, өпкөнү жасалма дем алдыруучу инвазивдүү жана инвазивдүү эмес ыкмаларды колдонуу боюнча бир топ кеп-кеңештерди берген. Андан сырткары коронавирустун алдын алуу боюнча да бир топ сунуштар айтылган.
Ноокаттык медиктер кан куюп COVID-19дан айыктырышууда. Дарыгер Марипов менен маек
Өлкө боюнча COVID илештирип алгандардын жалпы саны 7094. Анын 2714ү айыгып, тилекке каршы, 78 киши көз жумду.
Коронавирустун кесепетинен келип чыккан пневмония оорусуна март айынан бери 3009 адам чалдыкты. Бүгүнкү күндө анын 736сы айыгып чыкты. Ал эми 496 адамдын абалы оор, 153 бейтап жандандыруу бөлүмүндө жатат.
Өлкө аймагындагы соңку кабарлар менен биздин Telegram-каналдан таанышып туруңуз.
