Sputnik Кыргызстан агенттиги эл өкүлүнүн буга чейин жасаган иштерине саресеп салып, ал тууралуу кызыктуу фактыларды топтоду.
Дарыгердин баласы. Улан Чолпонбаев 1977-жылы Фрунзе шаарында дарыгер жана мугалимдин үй-бүлөсүндө төрөлгөн. Балалык чагы Ысык-Көл облусунун Ак-Суу районунун Боз-Учук айылында өткөн.
Студенттик кези. 20 жашында Кыргызстан эл аралык университетинин "Дипломатия жана эл аралык укук" адистигин бүтүргөн. Андан соң Россиянын президентине караштуу эл чарба жана мамлекеттик кызмат россиялык академиясынын угуучусу болгон.
Маданиятты сыйлаган ишмер. Ысык-Көлдөгү Манжылы-Ата жана башка маданий объектилерди кайра курдурган. Манасчы Шаабай Азизов, жазуучулар Касымалы Жантөшев, Зуура Сооронбаева, Кыдыр Аке, чыгаан комузчу Ыбырай Тумановдун жана белгилүү филолог Кусеин Карасаевдин мааракелерин өткөргөн. Аларга музей куруп, реставрациялап, ичин экспонат менен китептерге толтурган. Анын "эгерде биз бабалардын мурасын унутта калтырсак, кыргыздын бүтүндѳй бир доорун унуткан болобуз", – деген сөзү бар. Мындан сырткары, Чолпонбаев азыркы маданият өкүлдөрүнө көмөк көрсөтүп, "Салам, Нью-Йорк" кинотасмасын тартууга, "Азия-Mix", "Тамашоу", "Элес" топторуна колдоо көрсөтүп келген. Ошондой эле жазуучу Жамал Акматалиева менен биргеликте "Ыйык Ысык-Көл" деген китеп жазган.
Кайрымдуулук иштери. Эл өкүлү өз эсебинен Ысык-Көл облусунун Ак-Суу районунүн жолдорун асфальттап, балдар үйүнө, Тез жардам пунктуна унаа алып берип, жетим балдарга, согуштун жана эмгектин ардагерлерине, баатыр энелерге, айыл өкмөттөр менен жаштарга материалдык жардам көрсөтүп турган.
Кыркында кыйраган депутат. Чолпонбаевдин жакындарынын айтымында, ал өлөр алдында кыска мөөнөткө комага түшүп калган. Буга чейин борбор калаадагы ооруканалардын биринде бөйрөгүн дарылатып жаткан. Улан Чолпонбаевдин сөөгү 13-ноябрь күнү саат 11.00дө "Ала-Арча" көрүстөнүнө коюлат.
