БИШКЕК, 20-окт. — Sputnik. "Республика — Ата-Журт" фракциясынын лидери Өмүрбек Бабанов анын президент болбой калганына кейип ыйлаган кичинекей кыз менен жолукканы саясатчынын Instagram баракчасына жарыяланды.
Буга чейин социалдык тармактарда беш жашар бөбөктүн Бабановдун президент болбой калышына кейип ыйлаган видеосу тарап кеткен. Бабановдун аккаунтунда беш жаштагы Алия Караколдо жашай турганы аныкталганы жазылган. Саясатчы ага куурчак менен планшет белекке берген.
"Республика — Ата-Журт" фракциясынын катчылыгы жолугушуу Бабановдун өзү тарабынан демилгеленгенин билдирди.
"Өмүрбек Токтогулович роликти көргөндөн кийин "ал кыз менен жолугушум керек" деп чечти. Жолугушуу Бишкекте, кечээ болду", — дешти катчылыктан.
Эске салсак, Кыргызстанда президенттик шайлоо 15-октябрда өткөн. Анда 11 талапкер ат салышкан.
Добуштарды кол менен саноонун алдын ала жыйынтыгы боюнча Бабанов шайлоодо экинчи орунду алган. Алдыда Сооронбай Жээнбеков келе жатат. Азырынча расмий жыйынтык чыга элек.
