БИШКЕК, 27-апр. — Sputnik. Кытайдын өнүгүп келе жаткан өлкөлөрдү колдоону уланта турганы жөнүндө Сиздин (Си Цзиньпин – ред.) билдирүүңүздү бизди колдоо катары кабыл алдык. Президент Сооронбай Жээнбековдун мындай пикирин "Бир алкак — бир жол" эл аралык форумунда сүйлөп жатып айтканын мамлекет башчынын маалымат кызматы кабарлады.
Мамлекет башчы 2019-жылдын 25-апрелинде жумушчу сапары менен Кытайга кеткен.
Президент "Бир алкак – бир жол" эл аралык кызматташтыктын экинчи форумундагы эл аралык кызматташтык боюнча сессиялардын ишине катышкан.
Форумдун 1-сессиясында Жээнбеков да "Өнүгүүнүн жаңы кыймылдаткыч күчтөрүн издөө үчүн өз ара байланыштарды бекемдөө" деп аталган темада сөз сүйлөгөн.
"Мен форумдун ачылышындагы сиздин (Кытайдын төрагасы Си Цзиньпин – ред.) сөзүңүздү кунт коюп уктум. "Жашыл Жибек Жолун" жана "Чынчыл Жибек Жолун" түзүү жөнүндө сунушуңузду толугу менен колдойм. Кыргызстан агрардык өлкө катары экологиялык таза азык-түлүктөрүн өндүрүүнү жактайт. Биз Кытай өнүгүп келе жаткан өлкөлөрдү колдоону уланта турганы жөнүндө Сиздин билдирүүңүздү бизди колдоо катары кабыл алдык. "Бир алкак – бир жол" демилгесинин алкагында биргелешкен долбоорлорду ишке ашыруу маанилүү", — деген Жээнбеков.
Президент бул чоң иш-чара өлкөлөрдүн "Бир алкак – бир жолдун" алкагында мындан ары карай өз ара тыгыз кызматташуусуна өбөлгө болот деп ишенерин баса белгилеген.
Ал Кытай биргелешип гүлдөп-өнүгүү идеясын эле көтөрүп чыкпастан, реалдуу кадамдарды жасады деген пикирин билдирген.
Кытайдын төрагасы Си Цзиньпин форумдун 1-сессиясын ачкан соң, Россиянын, Өзбекстандын, Тажикстандын, Сербиянын, Чилинин, Сингапурдун, Пакистандын, Италиянын, Таиланддын, Эфиопиянын, Венгриянын, Грециянын жана башка өлкөлөрдүн делегация башчылары - президенттер жана премьер-министрлер сөз сүйлөгөн.
