БИШКЕК, 10-май — Sputnik. Кыргызстандын мурдагы премьер-министри Сапар Исаков Жогорку Кеңешке келди.
Ал буга чейин ТЭЦти модернизациялоо боюнча козголгон кылмыш иштин алкагында УКМКга суракка чакырылган болчу.
Жалпы жыйында депутат Рыскелди Момбеков мурдагы өкмөт башчылары Жантөрө Сатыбалдиев, Темир Сариев, Жоомарт Оторбаевди дагы чакыруу керектигин айтты.
Буга чейин депутаттык комиссиянын мүчөлөрү өз корутундусунда экс-премьер Жантөрө Сатыбалдиев менен экс-министр Осмонбек Артыкбаевдин жоопкерчилиги каралышы керектиги жазылганын билдиришкен.
Бишкек ТЭЦинде 26-январда болгон кырсыктын чоо-жайын жана ТЭЦти модернизациялоого корогон каражатты иликтөө үчүн түзүлгөн депутаттык комиссияга 12 депутат кирген.
Алар:
Аалы Карашев — КСДП;
Айбек Алтынбеков — "Республика — Ата Журт";
Аида Касымалиева — КСДП;
Акылбек Жамангулов — "Республика — Ата Журт";
Алмазбек Токторов — "Кыргызстан";
Данияр Аттокуров — КСДП;
Исланбек Сарсейитов — "Кыргызстан";
Исхак Масалиев — "Өнүгүү — Прогресс";
Мыктыбек Абдылдаев — "Бир Бол";
Сайдулла Нышанов — "Ата Мекен";
Улан Примов — КСДП;
Умбеталы Кыдыралиев — "Республика — Ата Журт".
Белгилей кетсек, 26-январда Бишкектеги ТЭЦте авария болуп калаадагы көп кабаттуу үйлөргө жылуулук берүү үзгүлтүккө учуруган. Кырдаал бир жумадан кийин гана калыбына келтирилип, бир катар жетекчилер жоопкерчиликке тартылган. Алардын ичинен ТЭЦтин диреткору Нурлан Өмүркул уулу кызматтан алынып, "Улуттук энергохолдинг компани" ишканасынын башчысы Айбек Калиев кызматтан алынып, камалган. Ошондой эле бир катар энергетиктер дагы ишинен кол жууп, камакка алынган.
