Өмүрбек Текебаев камакта калды

БИШКЕК, 29-мар. — Sputnik. "Ата Мекен" фракциясынын лидери Өмүрбек Текебаевди үй камагына чыгаруу боюнча арыз мөөнөтүнөн кеч берилгендиктен соттук коллегия көзөмөл өндүрүштү кыскартты. Бул тууралуу Жогорку соттун маалымат кызматы билдирди.

Жактоочунун арыздануусунун мөөнөтү өтүп кеткендигине байланыштуу, тагыраак айтканда КР Жазык-Процесстик кодексинин 375-беренесинин 3-бөлүмүнүн талаптары сакталбагандыктан, соттук коллегия көзөмөл өндүрүштү кыскартты. Ошондуктан Текебаевдин баш коргоо чарасынын туура же туура эмес тандалгандыгы боюнча маселени Жогорку сот караган жок.

"Мыйзамга ылайык, Текебаевдин жактоочусу Бишкек шаардык сотунун аныктамасы 9-мартта чыккандан тартып, 5 сутканын ичинде, 15-мартка чейин Жогорку сотко даттануусу керек эле. Бирок көзөмөл даттанууну 23-мартта гана тапшырылган", — деп айтылат маалыматта.

Эске салсак, Текебаев 26-февралда "Манас" аэропортунан кармалып, УКМКнын убактылуу кармоо жайына 48 саатка киргизилген. Кийин Биринчи Май райондук сотунун чечими менен эки айга, 25-апрелге чейин камакка алынган. Андан кийин анын тарапташтары бир нече ирет митингге чыгышкан. Райондук соттун чечимине нааразы болгон Текебаевдин жактоочусу шаардык сотко кайрылган, бирок сот доону канааттандырган эмес. Адвокат Жогорку сотко кайрылган.

Учурда Жогорку соттун алдында Текебаевдин тарапташтары митингге чыкты.