БИШКЕК, 29-мар. — Sputnik. Бишкек шаарындагы эски аянтка "Ата Мекен" партиясынын тарапташтары митинг өткөрүп жатышат. Бул тууралуу кабарчыбыз жеринен билдирди.
Буга чейин да Текебаевдин тарапташтары бир нече ирет митингге чогулуп, аны бошотуу талабын коюшкан. Эл өкүлү коррупция беренеси боюнча айыпталууда.
Андан сырткары кечээ кечинде "Ата Мекен" фракциясынын мурдагы депутаты Райкан Төлөгөнов УКМК тарабынан кармалган.
Атайын кызмат тараткан билдирүүгө ылайык, 2010-жылдагы апрель окуяларын иликтөө учурунда 7-10- апрель күндөрү Бакиевдердин үй-бүлөсүнө таандык кеңселерди, турак жайларды карактоо аракеттери Жогорку Кеңештин "Ата Мекен" партиясынан экс-депутаты Райкан Төлөгөновдун түздөн-түз жетекчилиги менен жасалганы аныкталган.
Митингге депутаттар Алмамбет Шыкмаматов, Садык Шер-Нияз баштаган эл өкүлдөрү келди. Андан сырткары, мурдагы депутат Асия Сасыкбаева дагы бар. Ал бул тынчтык митинги экенин айтты. Ал эми Шыкмаматов бийликтин аракетин саясий куугунтук катары сыпаттап, эл аралык уюмдарга кайрыла тургандыктарын баса белгиледи.
Текебаевдин жактоочулары "Сот! Демократияны чөгөлөтпө!", "Текебаеге боштондук!" деген жазуулар бар транспаранттарды көтөрүп алышкан.
