БИШКЕК, 15-мар. — Sputnik. Президент Алмазбек Атамбаев беш мамлекеттин Кыргызстандагы толук ыйгарым укуктуу элчилеринен ишеним грамотасын алды.
Атамбаев дипломаттардын ишмердүүлүгүнүн расмий башталышы менен куттуктап, Кыргызстан ачык, эркин жана демократиялуу коомду курууга чоң күч жумшаганын белгилеп өттү. Ал ошондой эле акыркы жылдары улуттук экономиканын өсүшү тууралуу дипломаттарды кабардар кылды.
Президенттин ар бир элчиге айткан кептери
Афганистан
"Афганистан менен болгон кызматташуу абдан маанилүү. Сиздердин өлкөдө туруктуулук жана тынчтык болушуна кызыкдарбыз. Афгандыктар бул эмне экенин жакшы түшүнүшөт… Биз келечекте Афганистанга жардам бере турган инфраструктуралык долбоорлорго активдүү катышуудабыз".
Индия
"Индия мен үчүн өзгөчө мамлекет. Отставкага чыккандан кийин силерге жыл сайын барып турууну ойлоп жатам. Бизди бирдиктүү менталитет менен жалпы тарых байланыштырып турат. Таж-Махал менен башка ири объектилердин курулуш иштеринин башында турган Бабур Оштон чыккан. Ошондой эле Индияга болгон былтыркы сапарымды жылуу сезимдер менен эскерем".
Латвия
"Биз бир мамлекетте жашадык. Мен кызматкерлериме "Биз эмнеге Германия, Австрия, Швейцарияга эле бара беребиз? Мен Латвия, Эстония, Финляндияга баргым келет" деп айттым… Эки тараптуу кызыкчылыкдарды эске алуу менен долбоорлордун үстүндө иштесек болот. Ошондой эле сиздердин өлкө башчыларыңыздарды кубануу менен тосуп алат элек".
Кот-д`Ивуар
"Бул абдан кызыктуу аймак. Биринчи адамдар Африкада пайда болгонун жана түбүбүз ошол жактан экенин бардыгыбыз билебиз. Африка өлкөлөрү анын ичинде Кот-д`Ивуар менен тыгыз кызматташууну каалайбыз".
Эфиопия
"Эфиопияда байыркы салт-санаа менен маданиятты сактап калган улуу калк жашайт. Андагы падышалар иудейлердин китептеринде эскерилет. Кыргызстан сиздер менен болгон мамилени чыңдоого кызыкдар".
Мамлекет башчы элчилерди өлкөлөр ортосундагы кызматташууну жаңы деңгээлге чыгарууга салым кошууга чакырды.
