БИШКЕК, 6-май — Sputnik. Борбордук шайлоо комиссиясы "Бир Бол" партиясынын тизмеси менен Жогорку кеңешке депутат болуп келген Лунара Мамытованын мандат тапшыруу боюнча арызын кабыл алды. Бул тууралуу аталган мекеменин маалымат кызматы билдирди.
Эскерте кетсек, Мамытова 29-апрель күнү депутаттык манданттан баш тартканын жана бул тууралуу арыз менен БШКга кайрылганын билдирген.
"Мен үчүн адам бойдон калуу — башкы максат! Кресло үчүн өлбөйм! Кыргызстаныбыздын саясий чөйрөсүндө аз убакыт болсом да, саясаттын чыныгы жүзүн биле алдым", — деп жазган экс-депутат өзүнүн социалдык тармактагы баракчасына.
Борбордук шайлоо комиссиясы Мамытованын ордуна "Бир Бол" партиясынын тизмесиндеги Улукбек Ормоновго депутаттык мандат тапшырды.
