"Кыргызстан" фракциясынын дагы бир депутаты мандатынан ажырады

БИШКЕК, 3-фев. — Sputnik. "Кыргызстан" партиясынын тизмеси менен Жогорку Кеңешке депутат болуп келген Урмат Ишенбековду Борбордук шайлоо комиссиясы мандатынан ажаратты. Бул тууралуу БШКнын мүчөсү Жеңиш Акматов Sputnik Кыргызстан маалымат агенттигине билдирди.

Белгилей кетсек, буга чейин "Кыргызстан" фракциясы өз катарындагы депутаттар – Элмира Жумалиеваны, Чолпон Эсенаманованы жана Урмат Ишенбековду мандатынан ажыратуу боюнча чечимин БШКга жиберген. Борбордук шайлоо комиссиясы эки депутат – Элмира Жумалиева менен Чолпон Эсенаманованы мандаттан ажыратуу боюнча чечим кабыл алган. 

Ал эми Урмат Ишенбековду мандатынан ажыратуу процесси өзүнүн жана фракция жетекчисинин суранычы менен кийинкиге калтырганын Акматов белгиледи.

"Фракция жетекчиси менен маселени чечип алабыз, жылдырып бергиле деп эки тарап тең суранганынан биз жылдырып бергенбиз. Бул маселе ачык калган", — дейт Акматов.

Бирок, алар дээрлик бир айдан бери бир пикирге келбегендиктен жана "Кыргызстан" фракциясы январь айынын башында "биздин мурунку чечимимбиз күчүндө" деген кайрылуусун жибергендиктен Ишенбеков бүгүн мандатынан ажыратылганын Акматов кошумчалады.