Ээрден шыпырылган депутаттар Жумалиева менен Эсенаманованын тагдыры кыл учунда турат

БИШКЕК, 15-янв. — Sputnik. "Кыргызстан" саясий партиясынан Жогорку Кеңешке депутат болуп келген Элмира Жумалиева менен Чолпон Эсенаманованын мандаттан ажыратылышы боюнча ишти карап жаткан Биринчи Май райондук сотунун судьясы Алмаз Калыбаев чечим кабыл алуу үчүн танапис жарыялады.

Үстүбүздөгү жылдын 11-январында БШК эки депутатты мандатынан ажыратуу чечимин чыгарган. Буга партиянын сунушу негиз болгонун айтышкан. Жумалиева менен Эсенаманова мандатын өткөрүп берүү боюнча арыз жазбаганын билдиришүүдө. 

Алардын жактоочусу Сырга Исабаева Sputnik Кыргызстан маалымат агенттигине берген маегинде депутаттар мандатынан мыйзамсыз ажыратылганын билдирди.

"БШК бир гана партиянын чечими менен депутаттарды мандаттан ажырата албайт. Депутаттарды Бишкек шаардык аймактык комиссиясы каттоого алган, андыктан чечимди алар чыгарыш керек болчу", — дейт ал.

Исабаева ошондой эле райондук сот адилеттүү чечим чыгарат деп ишенерин кошумчалады.

Ал эми БШК өкүлү Рашид Бекбасаров депутатты мандаттан ажыратуу үчүн партиянын чечими жетиштүү экенин айтып, БШКнын бардык аракети мыйзам чегинде болгонун белгиледи. 

Жактоочу "Кыргызстан" саясий партиясынын тизмеси менен келген эл өкүлдөрү 26-сентябрда эле шайлоодо жетиштүү добуш алалбаса мандаттан баш тарта турганы боюнча арызды күн мурунтан жазганын билдирди. 

"Элмира Жумалиева менен Чолпон Эсенаманова өз аймактарынан жетиштүү добуш алышкан. Балким, алар партия ичиндеги оюндардан улам мандатынан ажыратылып жаткандай. Фракция лидери да аларды мандаттан ажыратуу боюнча чечимге түшүндүрмө бере элек", — дейт Исабаева.

Ал эгер Биринчи Май райондук соту адилетсиз чечим чыгара турган болсо жогорку инстанцияларга кайрылу турганын кошумчалады.

Учурда Биринчи Май райондук соттун алдында депутаттардын 10-15тей жактоочусу турат.