БИШКЕК, 3-окт. — Sputnik. Эл ташыган маршрутканын айдоочусу жүргүнчү аялды сөгүп, кол көтөргөн видео Facebook тармагына жарыяланды.
Видеону жүктөгөн Айдана Абдылдаева аттуу колдонуучу окуя Бишкек — Кара–Балтага каттаган №302 маршруткада болгонун жазган.
"Жүргүнчү музыканын үнүн акырындатып кой десе, аны аябай кагып-силкип жатат. Жада калса унаасын токтотуп, аялды сыртка алып чыгып балдарынын көзүнчө сабады. Байкуш балдарынын жүрөгү түшүп калды. Мен да видеодон айдоочунун агрессиясын көрүп жакамды кармадым", — деп жазган ал.
Жол кыймылы коопсуздугун камсыздоо башкы башкармалыгынын маалымат кызматы бул боюнча териштирүү жүрүп жатканын жана айдоочу бүгүн кечке кармала турганын билдирди. Ишти ЖКККББнын Техникалык көзөмөлдөө башкармалыгынын начальниги Мирлан Боёнов өз көзөмөлүнө алган.
