Атайын операция учурунда каза болгондор күйөө баласы менен кайын энеси болуп чыкты

Жазылуу
Каза болгон үй-бүлө Алтынбек Итибаев жашынган батирге коңшу, 3-кабатта жашашкан.

БИШКЕК, 23-окт. — Sputnik. Атайын операция учурунда каза болгондор бир үй-бүлөнүн мүчөлөрү — күйөө баласы менен кайын энеси болуп чыкты. Бул туурасында Sputnik маалымат агенттигине ИИМдин өкүлү билдирди.

Кылмышкер Алтынбек Итибаев жашынып, атышкан батирден тартылган кадрлар
"Достук" кичи районунда жашырынып отурган, мындан он бир күн мурун түрмөдөн качкан кылмышкер Алтынбек Итибаевди кармоо боюнча атайын операция болду. Ал милиция менен атышып, каршылык көрсөткөн. Үч саатка созулган атайын операциядан кийин кылмышкер жок кылынган. Аны менен кошо ИИМдин атайын даярдыктагы ыкчам отрядынын жоокери башына тийген октон курман болуп, бири колунан жаракат алды. Буга чейин эркек киши каза тапкандыгы кабарланган. Милициядан бул операция учурунда дагы эки жаран — кемпир жана анын күйөө баласы өлгөндүгүн билдиришти.

Алтынбек Итибаев жашынган үйдүн тургуну атайын операциянын жүрүшү жөнүндө айтып берди
Өткөн аптанын башында 50-түрмөдөн тогуз кылмышкер ЖАМКтын үч кызматкерин өлтүрүп, дагы бири оор жарадар кылып качып чыгышкан. Ооруканага жеткирилген офицер беш күндөн кийин эсине келбей каза болгон.

Качкан кылмышкерлердин бешөө ошол эле түнү кармалып, төртөө из суутканга үлгүргөн. Атайы операциянын натыйжасында алардын экөө жок кылынган. Бирөөсү Эдил Абдырахманов бүгүн "Ала-Тоо" айылынан кармалган. Ал эми түрмөгө кайтарылган кылмышкерлердин үчөө ооруканадан үч күндүн ичинде каза болду.

Издөөдө Итибаев жалгыз калган эле.

Жаңылыктар түрмөгү
0