Качып жүргөн кылмышкерди кармоо үчүн ал жашынып отурган үчүнчү кабатты ИИМдин атайын даярдыктагы ыкчам отрядынын жоокерлери камалоого алган. Андан угулган ызы-чуу жашоочулардын жүрөгүн түшүргөндүгүн биринчи кабатта жашаган Наталья айтып берди.
Ал небереси менен мектептен үйгө саат алтыларда келе жатып, подъездде шектүү сезилген эки жигитти көрөт .
"Байкасам, алардын бирөөнү аңдыгандай түрлөрү бар. Эки жакты, подъезддин ичин карап, үчүнчү кабат жакка байкоо салышты. Бир убакта бирөөлөр эшикти талкалап жаткандай болуп, кыйкырык-чуу угулду. Эмне болуп кетти деп эшикти ачтым. Экинчи кабаттын ортосунда бир он чакты жигит жүрүптүр. Алар "эшикти тез жапкыла" дегенде кайра кире качтым. Коркконубузду сурабагыла", — деди ал.
Атайын операция үч саатка жакын созулуп, акырында качып жүргөн кылмышкер Алтынбек Итибаев өлтүрүлдү. Аны менен кошо ИИМдин атайын даярдыктагы ыкчам отрядынын бир жоокери курман болуп, эки жай жаран каза болду.
Качкан кылмышкерлердин бешөө ошол эле түнү кармалып, төртөө из суутканга үлгүргөн. Атайы операциянын натыйжасында алардын экөө жок кылынды. Бирөөсү Эдил Абдырахманов бүгүн "Ала-Тоо" айылынан кармалган. Ал эми түрмөгө кайтарылган кылмышкерлердин үчөө ооруканадан үч күндүн ичинде каза болду.
Издөөдө Итибаев жалгыз калган эле.
