БИШКЕК, 16-дек. — Sputnik. Премьер-министрдин милдетин аткаруучу Артем Новиков күнүмдүк керектелүүчү азыктардын баасын турукташтыруу боюнча тиешелүү органдарга тапшырма берди. Бул тууралуу өкмөттүн маалымат кызматынан билдиришти.
Ал азык-түлүк коопсуздугун камсыз кылуу маселеси боюнча жыйынга катышты.
"Бир айдан бери күнүмдүк керектелүүчү азыктардын кымбатташын ооздуктоо боюнча иш жүргүздүк, бирок кырдаалды жөнгө сала албай жатабыз. Баа саясатына мониторинг жүргүзүү боюнча берилген тапшырмалардын, товарларды дүңүнөн сатуучулар менен сүйлөшүүлөрдү жүргүзүү, жарманкелерди уюштуруу боюнча аткарылган иштердин негизинде акыркы жумаларда бааларды кармап турду. Бирок бул биз көздөгөн нерсе эмес", — деди Новиков.
Бааларды талдай келгенде социалдык жактан маанилүү азык-түлүктөрдүн наркы аймактар боюнча ар кандай экени аныкталган.
Мындай кырдаалдан чыгуу үчүн Новиков товар ташып келүүдө ортомчу уюмдарды четтетип, өндүрүүчүлөр менен түз келишимдерди түзүү зарыл экенин айтты. Ошондой эле мыйзамсыз экспорттоону токтотуу керектиги кошумчаланды.
"Бодо малды мыйзамсыз экспорттоого тыюу салынганына карабай, эттин баасы арзандабай жатат. Бир аз төмөндөгөндөн кийин базардагы дүң баалар кайрадан көтөрүлдү. Бул белгиленген чектөөлөрдү айланып өтүү механизми бар экенинен кабар берет. Ошондуктан Финансы полициясы менен Салык кызматына социалдык маанилүү товарлардын дүң бааларына жараша чекене базардагы рентабелдүүлүк деңгээлине мониторинг жүргүзүү боюнча тапшырмалар берилди", — деди Новиков.
Мындан тышкары, өкмөт башчынын милдетин аткаруучу ушул жумада пилоттук негизде соода борборлорунун аймагында жарманкелер башталарын эске салды.
Ошондой эле Бишкек шаарында ар дем алыш күндөрү айыл чарба продукциясынын жарманкесин өткөрүү жана андагы баалар боюнча элге алдын ала маалымат берүү зарылдыгы белгиленди.
