13:58 23 Баш оона 2019
Түз эфир
  • USD69.7961
  • EUR77.4597
  • RUB1.0636
Химиялык калдыктарыд жок кылуу. Архив

Ысык-Көлдө уран казгысы келген компаниянын таржымалы

© Sputnik / Андрей Александров
Экономика
Кыскача шилтеме алуу
Уран казууга каршы аракеттер (32)
404613

Жергиликтүү тургундардын бир катары уран кенин иштетүүгө каршы болуп нааразычылыктарын билдирүүдө. Sputnik Кыргызстан агенттиги кенди иштеткиси келген UrAsia in Kyrgyzstan компаниясы тууралуу фактыларды даярдады.

БИШКЕК, 21-апр. — Sputnik. Ысык-Көлдүн Тоң районунун жана Балыкчы шаарынын айрым тургундары Таш-Булактагы уран кенин казууга каршылыгын билдиришүүдө. Жергиликтүү эл буга чейин бир нече жолу митинг өткөрүүгө жетишти. Эл уран кени экологияны бузат деп тынчсызданууда. Ошол эле учурда жергиликтүү тургундардын бир бөлүгү чалгындоо иштеринин жүрүшүн колдоп жатышат.

20-апрелде ведомстволор аралык комиссиянын көчмө жыйыны болуп, жергиликтүү эл өз талаптарын айтышты. Комиссиянын курамына профилдик мекемелердин жетекчилери кирген, алар чалгындоо иштерин жүргүзүп жаткан UrAsia in Kyrgyzstan компаниясынын ишмердигин көзөмөлдөйт. Аталган компания Таш-Булактагы уранды иштетүүгө лицензия алуу үчүн документтерин топтоп жатат.

Буга чейин Өнөр жай, энергетика жана жер казынасын иштетүү боюнча мамлекеттик комитети маалымдагандай, UrAsia in Kyrgyzstan компаниясы сунуштап жаткан казып алуу ыкмасы кооптуулук жаратпайт. Башкача айтканда, техникалык суудан башка эч кандай реагенттер колдонулбайт жана уулуу заттар сактала турчу жай курулбайт.

Казып алынган руда кайра иштетүү үчүн Кара-Балтадагы тоо-кен комбинатына темир жол аркылуу атайын контейнерлер менен ташылып келет, андан уран, торий, фосфор, цирконий жана титан-магнетит элементтери алынат.

Sputnik Кыргызстан агенттиги UrAsia in Kyrgyzstan компаниясы тууралуу фактыларды даярдады. Маалыматтар Өнөр жай, энергетика жана жер казынасын иштетүү боюнча мамлекеттик комитетинин жана Юстиция министрлигинин сайтынан алынды.

Компания качан түзүлгөнү тууралуу так маалымат жок, бирок ал 2015-жылы кайрадан каттоодон өткөн. Мекеме Көк-Мойнок айылында каттоого алынган.

Компаниянын негиздөөчүлөрүнүн арасында чет элдиктер да бар, бирок алардын үлүшү канча экени көрсөтүлгөн эмес.

Компаниянын Кызыл-Омпол аймагындагы кенди иштетүү үчүн 2010-жылы алган бир лицензиясы бар.

Ишкананын ошондой эле алты негиздөөчүсү бар. Алардын төртөө жеке жак болсо, экөө юридикалык тарап (Юстиция министрлигинин сайтында көрсөтүлгөн тартипте берилди):

  • Azarga Resources Limited компаниясы ("Азарга Ресурсез Лимитед");
  • Казакбаев Эркинбек Абдыкаирович;
  • Urasia Mining Company ЖЧКсы ("Юразия Майнинг Компани");
  • Аширалиева Эльвира Аскеровна;
  • Касенов Дюйшеналы Рахимович;
  • Менг Светлана Владимировна.

Жетекчиси Светлана Менг, ал негиздөөчүлөрдүн бири.

Azarga Resources Limited ("Азарга Ресурсез Лимитед") компаниясы америкалык Azarga Uranium Corp. ишканасынын туунду компаниясы болуп саналат.

Urasia Mining Company ЖЧКсынын ("Юразия Майнинг Компани") курамында чет элдиктер жок. Жетекчиси жана негиздөөчүсү Абдылдаев Нурлан Мелисович. 2018-жылы компания кайрадан каттоодон өткөн, жаратылыш минералдарын жана тоо-кендерин казууга ыңгайлашкан.

Абдылдаев дагы төрт компаниянын жетекчиси, алардын экөөнүн негиздөөчүлөрүнүн катарына кирет. Түрдүү тармакта иш алып барат, анын ичинде курулуш жана кыймылсыз мүлк да бар.

Эркинбек Казакбаев эки компаниянын негиздөөчүлөрүнүн катарына кирет. Анын UrAsia in Kyrgyzstan компаниясынан тышкары "Тоо Суу" (электр энергия өндүрүү) компаниясында үлүшү бар.

Эльвира Аширалиева UrAsia in Kyrgyzstan компаниясынан тышкары үч компаниянын негиздөөчүлөрүнүн катарын толуктайт.

Дюйшеналы Касенов менен Светлана Менг UrAsia in Kyrgyzstan компаниясынын негиздөөчүлөрүнүн гана катарына кирет.

Боршайкомдун сайтындагы маалымат боюнча төрт киши тең Кыргызстандын жарандары.

Маалымат үчүн:

UrAsia in Kyrgyzstan компаниясы Таш-Булак кенин иштетүү программасына жалпы 10 миллион доллардан кем эмес каражат сарптоону пландап жатат.

Кенди иштетүүгө жергиликтүү эл үчүн 200-220 жумуш орун түзүлүп, Кара-Балта тоо-кен комбинатында 500дөн ашуун киши эмгектенет. Бул программа Кара-Балта тоо-кен комбинатын 25 жыл иштетүүгө пландалган.

Компания чалгындоо иштерине жалпысынан 271 миллион сомдон ашык каражат сарптайт. Азыркы учурда чалгындоо иштерин 112 киши жүргүзүп жатат, алардын ичинен 90 киши жергиликтүү элден тартылган.

Тема:
Уран казууга каршы аракеттер (32)

Тема боюнча

Өкмөт Кызыл-Омполдогу уран кени боюнча үн катты
Белгилер:
Кыргызстан, факты, уран

ЭҢ МААНИЛҮҮ