БИШКЕК, 27-дек. — Sputnik. Үчүнчү Дүйнөлүк көчмөндөр оюндары 2018-жылы сентябрь айында өтөт. Бул тууралуу Көчмөндөр оюндарынын катчылыгы билдирди.
Маалыматка ылайык, иш-чарада этноспорт оюндарынын 37 түрү көрсөтүлөт. Оюндардын негизги багыты – дүйнө элдеринин маданиятын, тарыхый мурастарын сактап, жандандыруу болуп саналат.
"III Көчмөндөр оюндары тынчтык орнотуу, биримдикти чыңдоо, байыркылыкты даңазалоо, түп нусканы сактоо максатын көздөйт. Бул маалда Кырчын капчыгайы көчмөн элдеринин оюндары, маданияты, салты, тиричилиги, оюн-зооктору көрсөтүлгөн дүйнөлүк деңгээлдеги этноаянтка айланат", — деп айтылат билдирүүдө.
Мындан тышкары, иш-чаранын алкагында этномаданий фестивалдар жана конкурстар, илимий конференциялар, симпозиумдар менен тегерек столдор уюштурулары айтылды.
