БИШКЕК, 1-июл. — Sputnik. Бүгүн Алыкул Осмонов атындагы улуттук китепканада Кыргыз эл баатыры Бексултан Жакиевдин 80 жылдыгына арналган "Кеменгер инсан, заман залкары" аттуу китеп-көргөзмө өтө турганын Маданият, маалымат жана туризм министрлиги билдирди.
Иш-чара саат 11.00дө башталат. Маалыматка ылайык, көргөзмөгө Жакиевдин чыгармалары, өмүр жолун баяндаган сүрөттөр коюлат.
Кыргыз Эл жазуучусу, Токтогул атындагы Мамлекеттик сыйлыктын лауреаты, коомдук ишмер, көрүнүктүү драматург, профессор Бексултан Жакиев 1936-жылы 16-январда Ысык-Көл облусунун Тоң районунун Бөкөнбаев айылында туулган.
Ал өзүнүн эмгек жолун 1959-жылы баштап, көп актылуу пьесалардын республикалык конкурсунда "Атанын тагдыры" пьесасы үчүн сыйлык алган. Чыгарма ушул кезге чейин өлкөнүн театрларында коюлуп келе жатат. Жакиев мындан тышкары "Миң кыял", "Алтын аяк", "Өкүм", "Эртең жаңы жыл", "Күттүргөн жаз да келер", "Күтүү", "Саадак какты", "Жүрөлүчү жүрөк оорутпай", "Бороондуу жолдо" сыяктуу чыгармалардын автору.
