БИШКЕК, 4-июн. — Sputnik. Кыргызстандын Маданият, маалымат, спорт жана жаштар саясаты министрлиги менен Россиянын Улуттук драма театры кызматташат. Бул тууралуу ведомстводон кабарлашты.
© Фото / пресс-служба МКИСиМП КР
Маалыматка караганда, театралдык искусство жаатындагы кызматташтыкты өнүктүрүү жана бекемдөөгө багытталган меморандумга маданият министри Алтынбек Максутов жана аталган театрдын директору Сергей Емельянов кол койду.
Тараптар 1-июнда Бишкекте жолугуп, анда алдыда маданият, искусство, креативдүү индустрия жана адабият ишмерлеринин ортосундагы биргелешкен кызматташтык иш-чараларын уюштуруу зарылдыгын белгилешти.
Ошондой эле жолугушуунун жүрүшүндө Сергей Емельянов квалификацияны жогорулатуу программасы "Улуттук театр мектеби" долбоорун 2023-жылы Кыргызстанда уюштуруу пландалып жатканын айтты.
Жолугушуунун жыйынтыгында тараптар театр искусствосу жаатында биргелешкен пландарды ишке ашыруу үчүн эки тараптуу кызматташууга даяр экендигин белгилешти.