БИШКЕК, 21-июн. — Sputnik. COVID-19 инфекциясына кабылып, бирок белгилери байкалбагандар үй шартында дарыланып жатканда кандай эрежелерди сактаганга милдеттүү экендиги тизмектелди. Мындай оорулуулар үчүн эскертмени Республикалык штаб таратты.
Белгилей кетсек, Саламаттык сактоо министрлигинин жаңы алгоритми боюнча коронавирус менен симптому жок күрөшкөндөр шартына карап үйдөн дарыланып жатат. Өлкөдө оору жаңы чыккан кезден тарта бардык бейтаптар стационарга жаткырылчу.
Эскертмеге ылайык, амбулатордук түрдө дарыланып жаткан бейтаптар төмөнкү талаптарды аткарууга милдеттүү.
- айланаңызда жүргөн жана үйдө чогуу жашаган адамдар менен байланышты токтотуңуз;
- дарылоо курсу аяктамайынча үйдөн чыкпаңыз;
- медиктердин кеңештерин так аткарыңыз;
- колду самындап жууңуз, андан соң антисептик колдонуңуз;
- жекече буюмдарды — идиш, сүлгү, шейшеп жана башкаларды колдонуңуз.
- чүчкүрүп же жөтөлгөн учурда ооз жана мурунду кагаз кол аарчы менен жабыңыз;
- бетиңизди кир кол менен же колдонулган кагаз кол аарчы менен кармабаңыз;
- үй-бүлө мүчөлөрү менен уюлдук телефон аркылуу байланышыңыз. Дайыма колдонулуучу гаджеттерди ар бир үч саат сайын дезинфекциялап, кагаз кол аарчы менен аарчып туруу зарыл;
- үй-бүлө мүчөлөрү жалпы пайдаланган (санитардык бөлмө, жуунуучу бөлмө) санитардык жайларды жана эшик туткаларын дезинфекциялоочу каражат менен (3% хлор кошулган) тазалоо зарыл;
- Эгерде абалыңыз начарласа же жаңы белгилер (дене табынын 38 градустан өйдө көтөрүлүшү, чыйрыгуу, тердөө, баш оору, булчуңдардын оорушу, жөтөл, дем алуунун жетишсиздиги, жүрөктүн тез-тез согушу, кусуу жана башка) пайда болсо, кечиктирбестен 103 номерине чалып, Тез жардам кызматын чакырыңыз.
Ошондой эле Республикалык штаб коронавирус менен ооруп, амбулатордук түрдө (оорунун белгилери билинбеген учурда) дарыланып жаткан бейтаптар менен бирге жашаган жарандар үчүн дагы эскертме берген.
- COVID-19 менен күрөшкөн бейтап менен байланышты азайтып, аны менен телефондон гана сүйлөшүү зарыл;
- колду тез-тезден самындап жууп тургула;
- тиричиликте колдонулган каражаттардын беттерин тазалап жана дезинфекциялап тургула;
- жөтөлгөндө жана чүчкүргөндө оозуңарды, мурдуңарды кагаз кол аарчы менен жаап, кол аарчыны колдонгон соң дароо таштандыга ыргыткыла;
- бөлмөнү тез-тезден желдетип тургула;
- 1,5 метр социалдык аралыкты сактагыла;
- кир кол менен көздү, мурунду же оозду кармабагыла;
- вирусту жуктуруп алуу тобокелдигин азайтуу үчүн бет кап кийгиле;
- сергек жашоо мүнөзүн кармангыла, толук кандуу уктагыла, белок, витамин жана минералдарга бай азык-түлүктөр менен тамактангыла, кыймылдоону унутпагыла.