Sputnik агенттиги окурманга жылуулук чачкан, жакшылык кылууга чакырган макалаларды жарыялап келет.
Социалдык желедеги өз күйөөсүнөн кордук көргөн аялдын видеосу интернетте бир топ талкуу болду. Булар сыртка чыгып билингендери, ал эми үй ичинен дымып, чыкпаганы канча дейсиз?
Бүгүнкү «Ак жарык» рубрикасына да жашоонун запкысынан, элдин сөзүнөн, кайнененин заарынан арылууга себепчи болгон уулдары, аркасынан таяган курбусу тууралуу айтып берген аялдын окуясы баяндалат.
…Жолдошум экөөбүз мындан жыйырма жыл мурун баш кошконбуз. Чүйдө турабыз.
Ошол аралыкта далай ыйладым. Беш жыл ичинде күйөөм да өзгөрдү. Бара-бара анын да сөзү чыгып, кол көтөрүп баштаган. Анысы аз келгенсип кыз-келиндер менен басып коймоюн да уга баштадым. Ошентип, он жыл өттү.
Ошентсе да жакын жашагандыктан мен мурункудай эле кайненеме кызматымды кыла бердим. Анткени он жылдан ашык бала жытын искете албадым деп өзүмдү жедим. Ал тургай жолдошум үйгө түнөбөй калганда да өзүмдү күнөөлөдүм. Кудайга жалбарып, бала тиледим. Доктурдан доктурга бардым. Боюма бүтүп эле төрт айга жетпей түшүп калчу.
Жакын курбум менин сырымды толук билчү эле. Экөөбүздүн жолдошубуз чогуу иштейт. Ал жакшы табып, молдо, врач укса эле мени ой-боюма койбой жетелеп барчу. Мен ыйлаган сайын ал даба издечү. Канча ирет кол шилтеп, башым оогон жакка басып кетейин дедим, төрөбөгөн аялдын кимге кереги бар? Бирде мени менен кошо ыйлап, кээде катуу айтып урушуп, айрым учурда алдап-соолоп, айтор, Элмира жанымдан чыкпады. Мен да кадимкидей аны демөөр кылып, ага ишенип жашап калдым. Ошентип жүрүп он эки жылдан ашканда балканактай уулдуу болдум. Андан кийин эки жыл өтпөй дагы бир уул төрөп алдым. Мен сүйүнсөм, курбум Элмира менден аша кубанды.
Бирок көңүл чиркин жаман экен. Тоңуп калыптыр. Кээде отуруп неге мынча өзүмдү кордодум экен деп ойлоп кетем. Көрсө, ушул жашоомдун ак жарыгын, уулдарымды күтүп жүргөн экенмин. Азыр айтканым айткан, дегеним деген болуп, баарынын кеңешери мен болуп калдым.
Ушунча жыл көз жашымды сүртүп, жанымда болгон курбума рахмат! Ал болбосо жашоом кандай болмок эле, белгисиз. Ыраазымын сага, курбу болсо сендей болор, Элмира!