Садыр Жапаров: айдоочулукка үйрөткөн 10 айлык окуу мөөнөттү көп дебегиле
Жазылуу
БИШКЕК, 3-фев. — Sputnik. Айдоочулук күбөлүк үчүн 10 айлык окуу мөөнөтү көп эмес. Бул тууралуу президент Садыр Жапаров Транспорт каражаттарын жана айдоочулук курамды каттоо боюнча мамлекеттик борбордо эл менен жолугушууда айтты.
Өлкө башчы 10 айлык мөөнөт окутуунун бардык этаптарынан өтүп, экзаменден оңой өтүп кетүүгө мүмкүнчүлүк берерин белгиледи.
"48 миң сом төлөп, үч жарым ай окуп, жылдап экзаменден өтпөй жүргөнүңөр жакшыбы? Же 19 миң сом төлөп коюп 10 ай окуп, бир же болбосо эки жолу келип экзаменден өтүп кеткениңер жакшыбы? Мына азыр жылдап экзамен тапшыра албай жүргөндөр бар. Мен сиздерден суранарым, 10 ай аябай көп экен дебегиле. Биз келечек үчүн жасап жатабыз, каршы чыкпагыла. Иш башкаруучу Каныбек Туманбаевди, "Унаада" иштеген балдарды күнөөлөп жатасыңар. Мамлекеттик кызматта жана саясатта эки түрдөгү адамдар болот. Бир түрү тили менен буудай кууруйт, иш берсең жылдыра албайт. Кээ бир адамдар сүйлөй албайт, бирок айтканыңан артык кылып аткарып коёт. Мен бул маселени элге жеткиликтүү кылып түшүндүрө албай жаткандарынан улам өзүм келдим", — деди президент.
Жапаров бир кишиге үчтөн-төрттөн автомектеп катталганын айтып, арасында аларды туугандарына каттатып койгон мамлекеттик кызматкерлер да бар экенине токтолду.
Өлкө башчы буга чейин Кыргызстандагы жеке автомектептердин көпчүлүгү айдоочуларды сапаттуу даярдоого эмес, акча табууга багытталган деген пикирин айткан.
