Исаков: чылым чегүүнү көзөмөлдөгөн мыйзам толук кандуу иштебейт
© Sputnik / Асель Сыдыкова
Жазылуу
Саламаттык сактоо министрлигинин Ооруларды алдын алуу жана мамлекеттик санитардык-эпидемиологиялык көзөмөл департаментинин дарыгери Төлө Исаков коомдук жайларда чылым чеккендерге айып салынарын эскертти.
Коомдук жайларда тамеки тартууга тыюу салынарын жалпы элге жеткирүүбүз зарыл. Ал үчүн бир канча министрлик жана ЖМК өкүлдөрү биргелешип иш алып барганы оң. Мындай пикирин Төлө Исаков Sputnik Кыргызстан радиосуна маек куруп жатып айтты.
Исаков: чылым чегүүнү көзөмөлдөгөн мыйзам толук кандуу иштебейт
Анын маалыматында, чылым чегүүгө болбой турган коомдук жайлардын тизмесин жергиликтүү бийлик органдары белгилейт.
"Президент Садыр Жапаров "Кыргыз Республикасынын айрым мыйзам актыларына ("КРдин жарандарынын ден соолугун тамекини, никотинди керектөөнүн кесепеттеринен жана айланадагы тамеки түтүнүнүн жана аэрозолдун таасиринен коргоо жөнүндө" мыйзамы, КР Укук бузуулар жөнүндө кодексине) өзгөртүүлөрдү киргизүү жөнүндө" мыйзамга кол койду. Кабыл алынган мыйзамга ылайык, жергиликтүү өз алдынча башкаруу органдары тарабынан тамеки чегүү үчүн атайын бөлүнгөн жайларды кошпогондо, коомдук жайларда тамеки чегүүгө тыюу салуу киргизилет. Ошондой эле мамлекеттик органдардын, жергиликтүү өз алдынча башкаруу органдарынын, уюмдардын жана ишканалардын жетекчилери менчигинин түрүнө карабастан тамеки чегүү үчүн атайын жайларды бөлүп берүүгө жана аларды министрлер кабинети бекиткен санитардык-гигиеналык, өрткө каршы ченемдерге ылайык жабдууга милдеттүү. Укук бузуулар жөнүндө кодексинде 18 жашка чыга элек балдарга тамеки каражаттарын сатууга мүмкүнчүлүк түзгөн адамдардын жоопкерчилиги каралган. Андан сырткары, мыйзамдын талаптарын бузгандыгы үчүн айыптын өлчөмү көбөйтүлдү. Өкмөт мүчөлөрү баш болуп, Саламаттык сактоо министрлиги, Билим берүү жана илим министрлиги, Ички иштер министрлигинин чогуу иш алып баруусунун негизинде мониторинг жүргүзүлүп, өлкөдө бул мыйзам толук кандуу иштебегенине күбө болдук. Айрым мыйзамдардын бири-бирине карама-каршы келген учурлары бар. Мындан ары буга чейин аткарылбай келген мыйзамды өкмөт өз көзөмөлүнө аларын билдирди. Андан сырткары, электрондук тамекини өлкөгө алып кирбөө боюнча мыйзамга толуктоолор киргизилди. Бул биз үчүн өтө жакшы көрүнүш", — деди Исаков.
Ал, мындан тышкары, мыйзамда тамеки чегүүгө тыюу салынган коомдук жайлардын тизмеси так жазылбаганын баса белгиледи.
