Эч кимдин акысы жок! Депутаттар Бакировго кабинетин кайтарууну талап кылышты
11:29 23.11.2022 (Жаңыртылды: 11:50 23.11.2022)
Жазылуу
Парламенттин чарбалык иштерин караган президенттин иш башкармалыгы Бакировго 7-кабаттагы кабинетти бошотуп коюу талабы менен кат жөнөткөн. Эртеси эле депутаттын буюм-тайымдарын коридорго чыгарып салышкан.
БИШКЕК, 23-ноя. — Sputnik. Жогорку Кеңештин кээ бир депутаттары кесиптешти Өмүрбек Бакировдун кабинетинен чыгарылышын сындап, эл өкүлүнүн макамын тебелөө катары сыпаттады.
Тазабек Икрамов "ЖК депутатынын статусу жөнүндө" мыйзамдын 24-беренесине ылайык, депутатка тиешелүү кызматтык турак жай, иш бөлмө, автоунаа жана документтер текшерүүгө, тинтүүгө жатпай турганын белгиледи. Андыктан президенттин иш башкармалыгынын жетекчисинин орун басары Элмира Үсөнованы жумуштан алууну сунуштады.
Депутат Тазабек Икрамов
© Фото / пресс-служба Жогорку Кенеша
"Биз чектен ашып баратабыз, кат бергенден кийин күтүш керек эле. Башка кабинет бербей туруп бардык буюмдарын сыртка таштап койду. Урматтуу депутаттар, өзүбүздү-өзүбүз сыйлабастык болуп жатат. Нуржигит Кадырбеков айткандай, токсонубузду алдыга коюп эле кууп баратат. Ушул маселени карап, талапты коёлу. Депутатты сүйлөтпөй коюу — шайлоочуларды сүйлөтпөй коюу. "Кыргыз элим бар болсун, оозу-мурду жок болсун" дегенге баратабызбы?!" — деди Икрамов.
Ал эми Жалолидин Нурбаев башында VI чакырылыштын депутаттарын өз кабинетинде калтырууга макулдашканын белгиледи. Себеби алар Октябрь окуясынан кийин өз акчасына оңдоп чыгышкан. Ушуну чечип бербесе уят иш болорун айтты.
Адахан Мадумаров депутаттын макамы боюнча кабинетин тинтүүгө эмес, кирүүгө эч кимдин акысы жоктугун билдирди.
Эл өкүлү Адахан Мадумаров
© Фото / пресс-служба Жогорку Кенеша
"Депутат Бакиров жагабы же жакпайбы, экинчи маселе. Мага тийбесе болду, калганы эмне болсо ошо болсун дегендин жыйынтыгы ушуга келди. Биз кесиптешибиздин макамын коргой албасак, шайлоочулардын укугун кантип коргойбуз? Мага жакса башкача, жакпаса башкача мамиле болот дегенди токтотуш керек", — деди Мадумаров.
Натыйжада вице-спикер Нурбек Сыдыгалиев президенттин иш башкармалыгынын жетекчиси Каныбек Туманбаевди бүгүнкү жыйынга чакырып, түшүндүрмө сурай турган болушту.
Белгилей кетсек, өткөн жумада эл өкүлү Өмүрбек Бакиров УКМК төрагасы Камчыбек Ташиев менен кайым айтышкан. Ташиевге болушуп депутат Фархат Исмаилов кесиптеши менен мушташып кете жаздаган.
Андан соң парламенттин чарбалык иштерин караган президенттин иш башкармалыгы Бакировго 7-кабаттагы кабинетти бошотуп коюу талабы менен кат жөнөткөн. Эртеси эле депутаттын буюм-тайымдарын коридорго чыгарып салышкан.
22 Жетинин айы 2022, 11:53
