Муканова: коррупцияга каршы стратегия иштелип чыкты
© Sputnik / Асель Акмат
Жазылуу
Президентке караштуу коррупцияга каршы ишкердик кеңешинин башкы катчысы Нурипа Муканова аталган кеңеш түзүлгөндөн бери жасалган иштер тууралуу айтып берди.
Коррупцияга каршы стратегия иштелип чыкты. Бул тууралуу Нурипа Муканова Sputnik Кыргызстан радиосуна маек куруп жатып билдирди.
Муканова: коррупцияга каршы стратегия иштелип чыкты
Анын айтымында, коррупция менен күрөш актуалдуулугун жоготпой келе жатат.
"Коррупцияга каршы ишкердик кеңеш президенттин жарлыгы менен түзүлгөн. Ал кеңеш берүүчү орган жана анын курамына мамлекеттик кызматтын, коомдун, ЖКнын, бизнестин өкүлдөрү кирген. Кеңештин биринчи отуруму 2021-жылы 16-ноябрда өтүп, коррупция менен күрөшүү боюнча концепция кабыл алынган. Анын негизинде коррупцияга каршы стратегияны иштеп чыгуу тапшырылган. Ал бардык тармактын өкүлдөрү менен талкууланып, тийиштүү сунуштар кабыл алынып, кем-карчы толукталды. Учурда аталган стратегия даярдалып президенттин кароосуна жиберилди. Аталган стратегияда коррупциянын келип чыгуусу, аны алдын алуу мүмкүндүктөрү боюнча сунуштар жазылды. Мындан тышкары, жарандардан келип түшкөн кайрылуулардын негизинде бир нече комиссия түзүлүп иш алып барды. Жыйынтыгы коомчулукка ачык айтылып жатты. Маселен, жерди трансформациялоо боюнча мекемелер аралык комиссия түзүлдү. Натыйжада кадастр, жергиликтүү администрациянын жер боюнча өкүлчүлүгү, Мамкаттоо менен биргеликте уюшулган коррупциялык схема бар экени аныкталды. Мындан тышкары, борбор калаада "жер мафиясы" иштээри белгилүү болду. Учурда дагы жер боюнча кайрылуулар кеңештин катчылыгына келип түшүүдө", — деди Муканова.
Ошондой эле ал 25-ноябрда өтө турган Курултайдын күн тартибине коррупция менен күрөш маселеси дагы киргенин кошумчалады.
