Кулумбетов: электр энергиясын туура пайдаланганды үйрөнүү шарт
© Sputnik / Асель Акмат
Жазылуу
Энергияны үнөмдөө боюнча эксперт Жаныбек Кулумбетов кыш мезгилинде электр тогун аз сарптоо менен үйдү кантип жылуу кармап турса болорун айтты.
Кыш келер алдында энергияны үнөмдөө өтө актуалдуу маселеге айланарын Жаныбек Кулумбетов Sputnik Кыргызстан радиосуна маек куруп жатып билдирди.
Кулумбетов: электр энергиясын туура пайдаланганды үйрөнүү шарт
Анын айтымында, суук түшөр менен имараттардагы жана үйлөрдөгү электр энергиясын туура колдонууну үйрөнүү зарыл.
"Аба ырайы сууктай баштаганда электр энергиясын үнөмдөөнү ойлонуп баштайбыз. Үйлөрдүн жана имараттардын полун, дубалын, шыбын, эшигин туура жылуулоо менен энергияны азыраак сарптасак болот. Эгер кар жааганга чейин үлгүрбөй калгандар болсо, анда сырттан үйдүн ичине аба кире турган жылчыкчаларды карап, бүтөп чыгыш керек. Пластикалык терезелерди текшерип, шамалдын кайсы жерден кирип жатканын сезсе болот. Азыркы кезде бардык үйлөрдө электр менен иштеген буюмдар өтө көп. Мисалы, телефон заряддагычтар, кир жуугуч жана идиш жуугуч машиналар, телевизор. Ушул нерселерди сатып аларда да электр кубатын азыраак пайдаланганын карап алсак, энергияны бир топ үнөмдөмөкпүз. Ошондой эле үй куруп жатканда терезени түндүк тарапка эмес, күн чыккан жакка койсо күн тийген маалда үйдүн ичи жылуу болуп турушуна шарт түзүлөт", — деди Кулумбетов.
Ал өнүккөн өлкөлөрдө бөлмөдөгү жылуулукту сактай алган жана сырттан суукту киргизбеген пассивдүү үйлөр пайда болгонун, бул нерсени жакынкы жылдарда Кыргызстанда да колдонсо электр энергиясы бир топ үнөмдөлө турганын кошумчалады.
